Mål av Bjørnar Dalsegg Sæter, Hallvard Næss og Stein Todalshaug sikra Surnadal 3-2-siger og tre råsterke poeng borte mot Eidsvåg fredag kveld. Heimelaget kom til oppgjeret med ti strake sigrar på heimebane, men vart både slått og forbigått på tabellen av SIL. Serieleiar KFK spelte 1-1 mot Midsund, og dermed er avstanden frå andreplasserte Surnadal og opp no på sju poeng.
I helga vert Eidsvågdagane arrangert i Nesset, og den største godbiten på plakaten er utan tvil storoppgjeret mellom Eidsvåg og Surnadal i 4. divisjon.
Surnadal har vore botnsolide på heimebane i år, men i kjend stil slite litt meir på bortebane. Mot Tingvoll, som fredag vann 7-1 borte mot CFK/KBK 3, tok Webjørn Holten sitt mannskap likevel sin første bortesiger i serien sidan 2012, og mot Eidsvåg slo karane til på ny.
"Næssell" imponerte
Det tok berre ni minutt før den første ballen låg i Eidsvåg-nota bak tidlegare Surnadal-keeper Eystein Meese. Bjørnar Dalsegg Sæter sette inn sitt tiande seriemål for året, og 1-0 til Surnadal. Tek ein med cupkampar er den treffsikre angriparen allereie oppe i 14 obligatoriske mål denne sesongen - på 12 kampar.
SIL kom til kampen utan faste brikkar som kaptein Trond Blekken, Dan Blekken og Andreas Dalsegg Sæter, men som vi har sett heilt sidan i vinter, har vi i år ein brei tropp med mange kvalitetsspelarar klare til å bidra.
I dag fekk Hallvard Næss og Trond Resell sjansen på kvar sin kant, og duoen gjorde sine saker svært bra. Og jaggu var det ikkje nettopp Lionel Næssi som sørgja for 2-0 om lag midtvegs i første omgang.
Den driblegade kantspelaren vendte fint av ein stoppar før han sette ballen i lengste hjørne, og dermed stod det 2-0 til Surnadal etter 23 minutt.
Dessverre reduserte Eidsvåg ved Vegard Holte Opstad berre minuttet seinare. Målet kom på ei kontring, etter at Trond Resell hadde banka ballen i tverrliggaren for Surnadal.
2-1-leiinga vår heldt seg til pause, etter ein godt gjennomført førsteomgang sett med SIL-auger.
Todalshaug auka
Som følgje av dei nemnde fråvera vart Stein Todalshaug flytta djupare på midtbana, utan at det hindra den lettbeinte teknikaren i å teikne seg på scoringslista.
Berre tre minutt ut i andre omgang auka vår nummer 6 leiinga til 3-1, men nok ein gong slo Eidsvåg tilbake med ein gong - denne gong ved solide Einar Olav Brakstad. Stillinga var no 2-3, og framleis var det spelt berre 53 minutt.
Etter 65 minutt kom Lars Mogstad inn for Håkon Bredesen, medan Hampus Hoem og Emil Haugen Ansnes kom inn for Hallvard Næss og Ørjan Nes Haugen seks minutt seinare. Hoem fekk gult kort åtte minutt før slutt.
Andre omgang vart ikkje like godt som den første, men vi nekta Eidsvåg utlikning, og kunne gjennomføre ein solid "SIL-gutt HEI!" i garderoben etter kampslutt. Å vinne 3-2 borte mot eit robust og hardtkjempande Eidsvåg-lag er sterkt, særleg med tanke på at bruntrøyene og kom til kampen med 10 strake heimesigrar.
Vi takkar Eidsvåg for kampen, og ønskjer dei lykke til vidare i sesongen!
Neste A-kamp er heime mot Elnesvågen under Norsk Laksefestival: fredag 20. juni kl. 19.00. A-laget har vunne fire heimekampar på rad, og med di støtte jaktar karane nummer fem! Vel møtt på Syltøran, alle saman!
Kampfakta:
Eidsvåg-Surnadal 2-3 (1-2)
Eidsvåg stadion, fredag 13.6. kl. 19.00.
Mål:
0-1 Bjørnar Dalsegg Sæter (9.) (Assist ?)
0-2 Hallvard Næss (23.) (Assist Roy Bolme)
1-2 Vegard Holte Opstad (24.)
1-3 Stein Todalshaug (48.) (Assist Trond Resell)
2-3 Einar Olav Brakstad (53.)
Gult kort: Hampus Hoem.
Laget frå høgre mot venstre:
Steinar Bæverfjord Ranheim - Håkon Bredesen (Lars Mogstad 65.), Vegar Brøske, Ørjan Nes Haugen (72.), Simen Einmo Engdal - Snorre Larsen, Stein Todalshaug (Kaptein) - Trond Resell, Bjørnar Dalsegg Sæter, Hallvard Næss (Hampus Hoem 72.) - Roy Bolme.
